Los Angeles Lakers mposhti New Orleans Pelicans me shifrat 136:115, falë paraqitjes së shkëlqyer të Luka Donçiqit dhe LeBron Jamesit.
Ishte Donçiqi që asistoi LeBronin në minutën e katërt të ndeshjes për të shkruar historinë.
Luka asistoi Jamesin, i cili shënoi trepikësh dhe kështu kaloi shifrën e 50 mijë pikëve në NBA.
LeBroni e përfundoi ndeshjen me 34 pikë, dhe tani ka 41.871 pikë në sezonin e rregullt të NBA dhe 8.162 në plejof të këtij kompeticioni.
Krahas 34 pikëve, LeBron pati tetë kërcime dhe gjashtë asistime. I shkëlqyer ishte edhe Donçiqi me 30 pikë, tetë kërcime dhe 15 asistime.
Më herët gjatë së martës, James u shpall gjithashtu Lojtari i Muajit në Konferencën Perëndimore të NBA, pasi pati një mesatare prej 29.3 pikë, 10.5 kërcime dhe 6.9 asiste muajin e kaluar, duke u bërë lojtari më i vjetër që e fiton këtë çmim.
Lakersi vazhdon të jetë në formë të jashtëzakonshme dhe tani renditet i dyti në Konferencën e Perëndimit.
