Njohësi i qeverisjes lokale, Shkëlqim Jakupi, në emisionin “Ditari” në Tëvë1 ka komentuar situatën e krijuar me buxhetin e Komunës së Prishtinës, duke e konsideruar atë të padrejtë dhe të dëmshme për qytetarët.
Jakupi tha se vendi po përballet me një ngërç politik tash e një vit, që ka paralizuar funksionimin e institucioneve dhe po reflektohet drejtpërdrejt në shërbimet komunale.
“Gjendja është aspak e mirë dhe shumë e disfavorshme për qytetarët e Prishtinës e të Kosovës në përgjithësi. Kjo situatë është pasojë e bllokadës politike tash e një vit, ku pothuajse asnjë institucion shtetëror nuk po funksionon në përputhje me Kushtetutën, ligjet dhe kompetencat e veta në shërbim të qytetarëve. Mos-pagesat në Komunën e Prishtinës janë produkt i kësaj bllokade dhe i inateve politike mes nivelit qendror dhe lokal, ka deklaruar Jakupi.
Ai theksoi se qytetarët dhe punëtorët e Trafikut Urban janë ata që po bartin barrën e kësaj situate.
“Dy kategori po dëmtohen rëndë: punëtorët e Trafikut Urban, të cilët po mbesin pa paga, dhe qytetarët – studentë e pensionistë – që nuk po mund ta shfrytëzojnë shërbimin e transportit publik. Të dy palët kanë probleme, ndërsa në anën tjetër shohim vetëm replika politike: kryetari i Prishtinës duke kërkuar fonde dhe ministri që nuk i liron ato. Është një gjendje mjeruese”, u shpreh ai.
Jakupi kërkoi trajtim të barabartë të kryeqytetit nga Ministria e Financave.
“Ministria e Financave duhet ta trajtojë Komunën e Prishtinës njësoj si të gjitha komunat e tjera. Bllokada politike nuk mund të jetë arsye për të ndaluar funksionimin e shërbimeve publike, përfundoi Jakupi.
