Ish-drejtor i Zyrës Ligjore në MAPL, Shkëlqim Jakupi, i ftuar në Tëvë1, ka folur rreth rezultateve që do të sjellin peticionet për largimin e kryetarëve në veri.
Derisa tha se ligji e ka përcaktuar që largimi i kryetarëve të komunave të bëhet përmes procesit të votimit nga qytetarët, Jakupi shtoi se kur një udhëzim administrativ është i nënshkruar nga një ministër dhe pastaj kalon me kompetenca shtesë tek KQZ-ja, në këtë mënyrë do të implikohet edhe Presidenca e Kosovës.
“Ligji e ka përcaktuar që largimi i kryetarëve të komunave bëhet përmes një procesi të votimit të qytetarëve. Hapësira që s’është e rregulluar me asnjë ligj dhe asnjë akt nënligjor, lë shumë për të dëshiruar. Posaçërisht kur një udhëzim administrativ, i nënshkruar nga një ministër, kalon në kompetenca shtesë një institucioni kushtetues, siç është Komisioni Qendror Zgjedhor, e në të cilin ligj, përmendet ligji për zgjedhjet e përgjithshme dhe ligji për zgjedhjet lokale, implikohet edhe institucioni i Presidencës së Republikës së Kosovës”, deklaroi Jakupi në emisionin “Ditari”.
Ndërkaq, i pyetur se a duhet të ketë ndonjë vendim shtesë për procedurat se si të organizohet votimi, Jakupi vlerësoi që do duhej të ekzistojë një rregullore qeveritare e cila e përcakton pjesën teknike të organizimit.
“Këtë mund ta bëjë edhe KQZ-ja, ka kompetenca legjislative për ta bërë një gjë të tillë. Mirëpo, kjo s’mund të bëhet me procese administrative të nënshkruar nga individët”, shtoi tutje ish-drejtori i Zyrës Ligjore në MAPL.
Komisioni Qendror i Zgjedhjeve (KQZ), ka njoftuar se ka pranuar peticionin për shkarkimin e kryetarit të Zubin-Potokut, Izmir Zeqiri dhe se bazuar në legjislacionin në fuqi, do t’i verifikojë nënshkrimet.
Mbledhja e nënshkrimeve në këtë komunë ka nisur më 9 janar.
Nënshkrimet për shkarkimin e kryetarëve në veri janë mbledhur edhe në tri komunat tjera, Mitrovicë e Veriut, Leposaviq e Zveçan./teve1.info/.
