Bekim Kupina, këshilltar për media i presidentes Vjosa Osmani ka reaguar pas raportimit se ish-kryeparlamentari Jakup Krasniqi në webfaqen e Presidencës paraqitej si i akuzuar për krime lufte dhe krime kundër njerëzimit.
Kupina ka thënë se as presidentja Osmani dhe as stafi i saj politik nuk kanë qenë të njoftuar e as të konsultuar lidhur me ndërhyrjen në tekstin në webfaqen e Presidencës së Kosovës sa i përket biografisë së ish-u.d.Presidentit dhe Kryetarit të Kuvendit, z.Jakup Krasniqi.
Ai ka thënë se tashmë po hetohet momenti kur është ndërhyrë në tekst dhe nga kush.
“Rrjedhimisht, Presidentja Osmani ka kërkuar përgjegjësi të plotë për këtë rast dhe ndërmarrjen e menjëhershme të masave disiplinore për personat përgjegjës. Poashtu, qysh nesër do të kërkohet hetim nga ana e Policisë së Kosovës, Njësia për Krime Kibernetike.
I kërkojmë ndjesë z.Jakup Krasniqi dhe familjes së tij për situatën e krijuar dhe e sigurojmë se një veprim i tillë është bërë pa dijeninë e Presidentes dhe pa autorizim paraparak të askujt nga ekipi i saj”, ka shkruar ai në Facebook.
