Ministri në detyrë i Financave Punës dhe Transfereve, Hekuran Murati ka ftuar në takim për sot përfaqësuesit e komunitetit të bizneseve për të diskutuar çështjen e rritjes së pagës minimale.
Hulumtuesi i lartë në Institutin e Kosovës për Drejtësi (IKD), Naim Jakaj thekson se procesi për caktimin e pagës minimale në Kosovë mund të nisë vetëm pasi të jetë konstituuar Këshilli Ekonomiko-Social (KES) dhe të ketë një Qeveri funksionale, sipas procedurave të përcaktuara me ligj. Sipas tij, çdo konsultim apo vendim jashtë kësaj procedure, nuk do të ketë fuqi ligjore, bëjnë të ditur burime nga institucionet përkatëse.
“Sipas procedurës ligjore, vendosja e pagës minimale përfshin disa hapa të detyrueshëm: Konstituimi i Këshillit Ekonomiko-Social (KES) – organ tripalësh që përfaqëson Qeverinë, sindikatat dhe odat ekonomike. Propozimi i shumës së pagës minimale nga sindikatat, Ministria e Financave, Punës dhe Transfereve, si dhe odat ekonomike. Publikimi i propozimeve në Platformën për Konsultime Publike për të paktën 15 ditë. Adresimi i komenteve dhe rekomandimeve nga KES. Vendimi përfundimtar nga KES, i cili i dërgohet Qeverisë për miratim dhe zbatimi i vendimit, i cili hyn në fuqi nga 1 shkurt 2026”, ka shkruar Jakaj në Facebook.
Aktualisht paga minimale në vendin tonë është 350 euro bruto. Kjo rritje u bë në gusht të vitit të kaluar, disa ditë pasi hyri në fuqi Ligji për pagën minimale, i cili parashihte një rritje të pagës minimale në 264 euro bruto. Deri në fuqizimin e Ligjit të ri, paga minimale në Kosovë ishte 130 euro për punëtorët nën 35 vjeç dhe 170 euro për punëtorët deri në 65 vjeç.
