Pritja për një kafshatë bukë, ishte e gjatë.
Në këtë formë studentët shqiptarë prisnin disa orë për një pjatë të vetme ushqimi në Mensën e Studentëve në Prishtinë.
Trajtimi jo i barabartë i shqiptarëve në ish-Jugosllavi, arriti kulmin në marsin e vitit 1981.
Në hapësirat e kësaj mense, 44 vjet më parë filloi një revoltë studentore, që shumë shpejt u kthye në demonstrata gjithëpopullore.
“Jemi kthyer nga ligjëratat në konvikt. Pas konviktit kemi shkuar në mensë me ngrënë darkën në ora 17:00. Deri në ora 18:30 kemi prit në radhë sepse në atë kohë kanë qenë përmbi 30 mijë studentë sepse shumica prej tyre ushqeheshin në mensë. Në të njëjtën ditë ka qenë edhe një lojë futbolli, shumica kanë qenë meshkuj që pritshin në radhë me ngrënë bukë”, tha ish-studentja, Bahrije Besimi.
Tensioni po shtohej.
Kështu radha për të marrë ushqim, i erdhi ish-studentes të së Drejtës Kushtetuese, Bahrije Besimit.
E veprimi i saj spontan, bëri që të fillojnë demonstratat e vitit 1981.
“Para se me mbërri me marrë pjatën, i kam dëgjuar prapa disa studenta, kanë thënë që është mirë me fillua protesta se shumë njerëz ka sot. Ata kanë qenë; Bajram Kosumi, Ramadan Gashi, Kadri Kryeziu, Jonuz Jonuzaj etj. Hic s’kam hezituar në asnjë moment kur jam me marrë pjatën, ja kam hudh asaj serbes së pamëshirë për fytyre. Në atë moment janë nis, kemi dalë në sallë ku kanë qenë tu u ushqyer edhe tjerët, kemi thënë nuk duam më. Pra, protesta ka fillua që duam kushte më të mira, edhe pse nuk ishte qëllimi aty”.
Studentët që pretekst morën kushtet e këqija në mense, kishin qëllim shumë më madhor.
Kjo doli në pah bashkë me parullat për Kosovën Republikë.
“Kanë shumë pak studentë në sallë. E mbaj mend si sot, e kam pas një mantel me ngjyra të ushtrisë veshur, i kemi rrotulluar të gjitha tavolinat. Disa herë me kanë thënë largohu se po bie në sy vetëm ti femër, po nuk kam ditë me u frikësua në asnjë moment”, ka deklaruar ajo.
Ky reagim i studentëve, shpejt kapi syrin e forcave serbe.
“Kanë hyrë (policia serbe) me lotsjellës, meshkujt kanë kërcyer nga kati i parë dhe i dytë. Ka qenë i padurueshëm tymi në ambient të mbyllur. Kur kemi filluar me dalë, nuk ka pas studentë që nuk është godit me pendrekun e policisë”.
Me këtë ngjarje, filloi edhe zinxhiri i demonstratave të vitit 1981.
Sipas të dhënave, në to morën pjesë afër 1 milion shqiptarë në gjithë Kosovë.
