Ushtria izraelite lëshoi të dielën një urdhër të ri evakuimi për banorët në pjesët jugperëndimore të Deir al-Balah në Gazën qendrore, ndërsa zgjeron ofensivën e saj në zonë.
Në një deklaratë, zëdhënësi i ushtrisë, Avichay Adraee, urdhëroi civilët e vendosur në blloqet e banimit midis 130 dhe 2351, “përfshirë ata që strehohen në tenda”, të largohen nga zona dhe të shkojnë në jug drejt al-Mawasi.
Evakuimi ndërpret aksesin midis qytetit të Deir al-Balah dhe qyteteve jugore të Rafah dhe Khan Younis në enklavën e ngushtë
Zona Al-Mawasi, e përcaktuar vazhdimisht nga ushtria izraelite si një “zonë e sigurt”, është bërë jashtëzakonisht e mbipopulluar, me dhjetëra mijëra palestinezë të zhvendosur që jetojnë në kushte të tmerrshme humanitare.
Pavarësisht se është etiketuar si një “zonë e sigurt”, Anadolu raporton se, al-Mawasi është bombarduar disa herë gjatë luftës, me sulmet ajrore izraelite që kanë vrarë qindra civilë që strehoheshin atje.
Zona e Gazës nën urdhrin e evakuimit është gjithashtu vendi ku ndodhen shumë organizata ndërkombëtare që përpiqen të shpërndajnë ndihma, shkruan AP.
Forumi i Familjeve të Pengjeve, një organizatë bazë që përfaqëson shumë familje të pengjeve, dënoi njoftimin për evakuim dhe kërkoi që kryeministri Benjamin Netanyahu dhe ushtria izraelite të shpjegojnë se çfarë shpresojnë të arrijnë në zonën e Gazës qendrore, duke akuzuar Izraelin se po vepron pa një plan të qartë lufte.
“Mjaft! Populli izraelit dëshiron me shumicë dërrmuese një fund të luftimeve dhe një marrëveshje gjithëpërfshirëse që do të kthejë të gjithë pengjet”, tha forumi. Të shtunën në mbrëmje, gjatë protestës javore, dhjetëra mijëra protestues marshuan në Tel Aviv, duke demonstruar për t’i dhënë fund luftës.
Ushtria izraelite ka ndërmarrë një ofensivë brutale në Gaza që nga 7 tetori 2023, duke vrarë gati 59,000 palestinezë, shumica prej tyre gra dhe fëmijë. Bombardimet e pamëshirshme kanë shkatërruar enklavën dhe kanë çuar në mungesë ushqimi dhe përhapje të sëmundjeve.
Bisedimet për të arritur një marrëveshje për t’i dhënë fund luftës janë duke u zhvilluar aktualisht në Doha të Katarit.
