Të hënën, ushtria izraelite njoftoi se kishte ndërmarrë sulme ndaj qendrave komanduese të Gardës Revolucionare iraniane dhe forcave të tjera të sigurisë së brendshme, të cilat ajo i cilësoi si përgjegjëse për “ruajtjen e stabilitetit të regjimit”.
“Këto forca përbëhen nga struktura të ndryshme komanduese dhe veprojnë në emër të ushtrisë së regjimit iranian për të mbrojtur sigurinë kombëtare, për të shtypur kërcënimet dhe për të ruajtur stabilitetin e pushtetit,” thuhet në një deklaratë zyrtare, sipas Reuters.
Sulmet izraelite në Teheran vinë teksa më herët Irani lëshoi një serie raketash dhe dronësh të lëshuar drejt Izraelit, pas bombardimeve masive të ndërmarra një ditë më parë nga administrata e presidentit amerikan Donald Trump kundër tri impianteve bërthamore iraniane në Fordow, Natanz dhe Isfahan.
Izraeli konfirmoi gjithashtu se kishte goditur rrugët përreth objektit të pasurimit të uraniumit në Fordow për të kufizuar aksesin në zonë.
Ky impiant nëntokësor ishte një nga objektivat e sulmuar nga SHBA të dielën dhe, sipas raportimeve nga televizioni shtetëror iranian, u godit përsëri të hënën.
Nuk është bërë ende e ditur shkalla e dëmeve apo se kush ishte përgjegjës për sulmin e fundit, megjithëse Izraeli ka deklaruar më parë se po ndërmerrte sulme ajrore ndaj Iranit.
Ndër objektivat e goditur në kryeqytetin iranian ishte edhe burgu Evin si dhe selia e sigurisë së Gardës Revolucionare, sipas Ministrisë së Mbrojtjes së Izraelit.
“Diktatori iranian do të përballet me një ndëshkim të ashpër për sulmin ndaj frontit të brendshëm izraelit,” tha ministria në një deklaratë.
