Izraeli ndërpreu furnizimin me energji elektrike në Gaza, të dielën thanë zyrtarët, pasi që javën e kaluar pezulloi furnizimet me mallra për gjithë territorin.
Hamasi e quajti këtë pjesë “të politikës së urisë” së Izraelit.
Izraeli po i bën presion grupit palestinezë që të pranojë një zgjatje të fazës së parë të armëpushimit që përfundoi javën e kaluar, ku kërkon lirimin e gjysmës së pengjeve në këmbim të një premtimi për të negociuar për një armëpushim afatgjatë.
Hamasi në vend të kësaj dëshiron të nisë negociatat për fazën e dytë më të vështirë të armëpushimit, e cila do të shihte lirimin e pengjeve të mbetura nga Gaza, tërheqjen e forcave izraelite dhe një paqe të qëndrueshme, raporton AP.
Territori dhe infrastruktura e Gazës janë shkatërruar në masë të madhe dhe shumica e objekteve, përfshirë spitalet, tani përdorin gjeneratorë.
Zëdhënësi i Hamasit, Hazem Qassam, tha se Izraeli “praktikisht” ka ndërprerë energjinë elektrike që nga fillimi i luftës dhe e quajti vendimin e fundit pjesë të “politikës së Izraelit të urisë, duke mos respektuar qartë ligjet dhe normat ndërkombëtare”.
Izraeli është përballur me kritika të ashpra për pezullimin e furnizimeve.
“Çdo mohim i hyrjes së gjërave të nevojshme për jetën e civilëve mund të përbëjë një dënim kolektiv”, tha të premten zyra e OKB-së për të drejtat e njeriut.
Udhëheqësi i grupit Houthi në Jemen, Abdul Malik al-Houthi, paralajmëroi të premten se sulmet kundër anijeve të lidhura me Izraelin në Jemen do të rifillojnë brenda katër ditëve nëse ndihma nuk rifillon për Gazën. Huthi i përshkruan sulmet e tyre të mëparshme si solidaritet me palestinezët atje.
