Ushtria izraelite ka ndaluar një anije ndihmash që shkonte në Gaza dhe që kërkonte të thyente bllokadën izraelite të territorit palestinez, duke ndaluar 21 aktivistë dhe gazetarë ndërkombëtarë dhe duke sekuestruar të gjitha ngarkesat, përfshirë formulën për foshnje, ushqimin dhe ilaçet, ka thënë të dielën Koalicioni i Flotiljes së Lirisë .
Koalicioni që operon anijen Handala ka thënë se ushtria izraelite “ka kapur me dhunë” anijen në ujërat ndërkombëtare rreth 40 milje detare nga Gaza, duke ndërprerë kamerat dhe komunikimin, pak para mesnatës së së shtunës, ka raportuar AP.
“E gjithë ngarkesa ishte jo-ushtarake, civile dhe e destinuar për shpërndarje të drejtpërdrejtë te një popullsi që përballet me uri të qëllimshme dhe kolaps mjekësor për shkak të bllokadës së paligjshme të Izraelit”, tha grupi në një deklaratë.
Ushtria izraelite nuk bëri asnjë koment të menjëhershëm. Ministria e Jashtme e Izraelit postoi në X të dielën në mëngjes se Marina ndaloi anijen dhe po e sillte atë në breg.
Ishte anija e dytë e operuar nga koalicioni që Izraeli e ka penguar në muajt e fundit të dërgojë ndihma në Gaza, ku ekspertët e ushqimit kanë paralajmëruar prej muajsh për rrezikun e urisë.
Rripi i Gazës dënoi të dielën sulmin ndaj anijes së ndihmave Handala nga ushtria izraelite si një akt “piraterie detare” dhe i kërkoi bashkësisë ndërkombëtare të mbrojë konvojet humanitare që shkojnë drejt enklavës së rrethuar.
Ajo e quajti bastisjen “një akt të hapur agresioni” dhe tha se “përbën një shkelje flagrante të ligjit ndërkombëtar dhe rregullave të lundrimit detar”.
Një transmetim i drejtpërdrejtë tregoi ushtarë të armatosur që hipnin në anije dhe u urdhëronin aktivistëve të ngrinin duart. Pak çaste më vonë, transmetimi u ndërpre dhe fati i ekuipazhit dhe pasagjerëve të anijes mbetet i panjohur.
Gaza po përjeton një nga krizat më të këqija humanitare në historinë e saj, ku uria e rëndë përkeqësohet nga ajo që palestinezët e quajnë gjenocid të kryer nga Izraeli që nga 7 tetori 2023.
Mbyllja e kalimeve kufitare dhe ndalimi i ushqimit dhe ilaçeve që nga 2 marsi ka shkaktuar uri të përhapur dhe kequshqyerje të rëndë për fëmijët dhe pacientët.
View this post on Instagram
