Izraeli ka miratuar të hënën planet për të pushtuar të gjithë Rripin e Gazës dhe për të qëndruar në territor për një kohë të pacaktuar, thanë zyrtarët izraelitë.
Nëse veprime të tilla zbatohen, kjo do të thotë zgjerim shumë herë më i madh i operacioneve ushtarake në territorin palestinez dhe ka të ngjarë të sjellë kundërshti të ashpër ndërkombëtare.
Plani u miratua nga ministrat izraelitë, disa orë pasi shefi i ushtrisë izraelite tha se ushtria po thërriste mijëra rezervistë, raporton AP.
Kanali izraelit 12 tha se plani përfshin edhe zhvendosjen me forcë të palestinezëve nga Gaza veriore në jug.
Që kur Izraeli prishi një armëpushim me Hamasin në mesin e marsit, Izraeli ka nisur sulme të ashpra në territor që kanë vrarë qindra njerëz. Ai ka pushtuar pjesë të mëdha të territorit dhe tani kontrollon afërsisht 50% të Gazës.
Përpara se armëpushimi të përfundonte, Izraeli ndaloi të gjithë ndihmën humanitare në Gaza , duke përfshirë ushqimin, karburantin dhe ujin, duke shkaktuar atë që besohet të jetë kriza më e keqe humanitare në gati 19 muaj luftë.
Më shumë se 52,500 palestinezë janë vrarë në Gaza në një sulm brutal izraelit që nga tetori i vitit 2023, shumica prej tyre gra dhe fëmijë.
