Kabineti i Sigurisë i Izraelit ka miratuar një plan për të ndarë 13 kolona në Bregun Perëndimor të pushtuar, ka thënë të dielën ministri i Financave, Bezalel Smotrich.
Vendbanimet do të njihen përfundimisht si të pavarura, postoi ai në X në lidhje me lëvizjen, e cila pason miratimin për dhjetëra mijëra njësi të banimit në të gjithë Bregun Perëndimor.
“Ne vazhdojmë të udhëheqim një revolucion të normalizimit dhe rregullimit në vendbanime. Në vend që të fshihemi dhe të kërkojmë falje – ne ngremë flamurin, ndërtojmë dhe vendosemi. Ky është një tjetër hap i rëndësishëm në rrugën drejt sovranitetit aktual në Judea dhe Samari (Bregu Perëndimor)”, tha Smotrich.
Hamasi e ka dënuar këtë lëvizje duke thënë se synon zhvendosjen e popullit, vjedhjen e tokës dhe vendeve të shenjta dhe vendosjen e një regjimi aparteid.
Ata i kanë bërë thirrje komunitetit ndërkombëtar që të ndërmarrë veprime për të ndaluar zgjerimin e paligjshëm të vendbanimeve të Izraelit në Bregun Perëndimor, raporton Anadoly.
Tensioni ka qenë i lartë në të gjithë Bregun Perëndimor të pushtuar, ku të paktën 937 palestinezë janë vrarë dhe mbi 7,000 janë plagosur në sulmet e ushtrisë izraelite dhe kolonëve të paligjshëm që nga fillimi i sulmit në Gaza më 7 tetor 2023, sipas Ministrisë palestineze të Shëndetësisë.
Në korrik, Gjykata Ndërkombëtare e Drejtësisë e shpalli të paligjshëm pushtimin e gjatë të territoreve palestineze nga Izraeli, duke bërë thirrje për evakuimin e të gjitha vendbanimeve në Bregun Perëndimor dhe Jerusalemin Lindor.
