Ushtria izraelite ka bombarduar shtëpitë në lagjen Shujayea, në qytetin verior të Gazës ku ka lënë të vdekur të paktën 29 njerëz dhe ka plagosur 55 të tjerë.
Së paku 80 persona të tjerë llogariten të zhdukur. Banorët që mbijetuan po mblidhen për të provuar të nxjerrin viktimat e bllokuara nga rrënojat – mes tyre fëmijë dhe gra.
Dronët izraelitë po fluturojnë mbi zonë, duke kërcënuar qindra njerëz të përfshirë në përpjekjet e shpëtimit.
Organizata bamirëse mjekësore, Mjekët pa Kufij thotë se sulmi izraelit goditi afër klinikës së saj në të ashtuquajturën zonë të sigurt të al-Mawasi në Gazën jugore.
Një i mbijetuar i masakrës u deklarua për Al Jazeera duke thënë: “Është një masakër me kuptimin e plotë të fjalës. Unë nuk kam parë apo dëgjuar për një masakër si kjo që nga fillimi i luftës. Shumica e dëshmorëve janë fëmijë dhe civilë të pambrojtur.”
Ushtria izraelite thotë se shënjestroi një luftëtar të lartë të Hamasit në sulmet ajrore që hodhën në erë një lagje të tërë në qytetin lindor të Gazës.
Kurse, grupi palestinez, Hamas ka denoncuar ushtrinë izraelite për sulmin masiv në lagjen Shujayea të qytetit të Gazës.
Masakrat e vazhdueshme kundër popullit tonë, me mbështetjen amerikane, janë një njollë në fytyrën e komunitetit ndërkombëtar, tha Hamasi në një deklaratë. “Krimet brutale të kryera para gjithë botës kundër civilëve të pafajshëm dhe të pambrojtur nuk do të mbeten pa u ndëshkuar dhe nuk do të harrohen.”
Zyra e Qeverisë për Media përditësoi numrin e vdekjeve që nga fillimi i luftës në më shumë se 61,700, duke thënë se mijëra njerëz të zhdukur nën rrënoja supozohen të vdekur.
