Sipas komunikatës së Prokurorisë së Themelore në Gjakovë, të ndaluarit dyshohen për kryerjen e veprës penale sipas Kodit Penal të Republikës së Kosovës”Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”.
“Prokurori i çështjes në bashkëpunim me Drejtorinë për Hetimin e Trafikimit me Narkotik në Prishtinë, gjatë një pune operative hetimore me dt.05-06.01.2023, kanë identifikuar të dyshuarin N.B shtetas të Republikës së Kosovës, i cili po transportonte me veturë substance narkotike që dyshohet të jetë marihuana, ashtu që gjatë kontrollimit të veturës janë gjetur 40 qese me substancë narkotike, e cila dyshohet të jetë e llojit marihuanë, në peshë të përgjithshme 42.506 kg, të cilat janë sekuestruar.
Po ashtu me datë 06.01.2023 ka vazhduar kontrolli dhe bastisja në objektin dhe lokalet përcjellëse të firmës B.C në Gjakovë, ku gjatë kontrollit janë gjetur 12 qese me substancë narkotike, e cila dyshohet të jetë e llojit marihuanë, në peshë të përgjithshme 6.383 kg, të cilat janë sekuestruar dhe në lidhje me këtë është arrestuar i dyshuari B.B.”, thuhet në komunikatë.
Sipas njoftimit të Prokurorisë, aksioni i policisë ka vazhduar edhe në dy lokacione tjera, në Prishtinë dhe në Gjakovë ku gjatë kontrollit dhe gjatë bastisjes janë gjetur dhe sekuestruar 88 gramë substancë narkotike, e cila dyshohet të jetë e llojit kokainë dhe dy shishe qelqi me vaj kanabisi, si dhe një revole me 24 fishek.
Me urdhër të prokurorit të pandehurit janë ndaluar për 48 orë, dhe brenda afatit të paraparë ligjor është paraqitur kërkesa për caktimin e masës së paraburgimit, kundër të pandehurve të lartcekur, për shkak të veprës penale, blerja, posedimi, shpërndarja dhe shitja e paautorizuar e narkotikëve, substancave psikotropike dhe analoge nga neni 267 të Kodit Penal të Republikës së Kosovës, thuhet në komunikatën e Priokurorisë së Gjakovës.
