Policia ka ndaluar një person në pikën kufitare të Hanit të Elezit, nën dyshimin se i njëjti mund të posedonte substanca narkotike.
Pas kontrolleve në tri prona të të dyshuarit, policia ka bërë të ditur se ka gjetur dhe sekuestruar 25 kg e 134 gr substancë të dyshuar marihuanë.
“Në bashkëpunim me autoritetet e drejtësisë (Prokurorinë e Shtetit dhe Gj. E P. Paraprake) në Prishtinë është realizuar Plani Taktik policor i koduar me emrin ‘’KTHESA’’, ku gjatë kontrolleve të zhvilluara në tri (3) lokacione: një banesë në Fushë Kosovë dhe dy shtëpi dhe objekte përcjellëse në fshatin Breznicë të Obiliqit, në cilësi të provave materiale janë gjetur dhe sekuestruar mbi njëzet e pesë kilogram (25 kg 134 gr.) substancë e dyshuar narkotike të llojit Marihuanë, të ndara në pesë (5) paketime. Sasia e sekuestruar dyshohet se ka qenë e destinuar për tregun vendor dhe që kap vlerën rreth njëzet e shtatë mijë e pesëqind euro (27.500 euro)”, thuhet në njoftimin e PK-së.
Përveç substancës narkotike, të njëjtit i është sekuestruar edhe vetura e tipit Ford Focus.
“Me vendim mbi ndalimin e personit, të dyshuarit i është caktuar masa e ndalimit prej 48 orëve”, thuhet në njoftimin e policisë.