Një thirrje telefonike nga vajza tre vjeç, bëri që Rifat Kacabashi të lërë punën në gjysmë.
Ai u nis menjëherë për në Topliçan të Lipjanit, pasi mori njoftimin se shtëpia i kishte marrë flakë.
E nëna arriti t’i nxjerrë katër vajzat, mirëpo jo edhe atë më të voglën, krejt kjo nga ngutia që kishte për ti shpëtuar të vegjlit.
Foshnja mbeti në këtë djep për pak minuta në dhomën e cila ende nuk ishte përfshirë nga flakët.
Prandaj e ëma në mes të zjarrit u kthye dhe e mori, duke e shpëtuar pastaj nga dera e pasme e shtëpisë.
Ndërsa për shuarjen e zjarrit intervenuan edhe zjarrfikësit.
“Rreth orës 11:40 minuta kemi marrë një lajm nga një qytetar së pari, kalimtar i rastit në Topliqan, pastaj nga Policia që është duke u djegur një shtëpi banimi dhe njësia kujdestare ka intervenu me kohë. Fatmirësisht afërsia ka bërë të mundur që pasojat të jenë më minimale, përkundër që është djeg një dhomë, korridori dhe tymi e ka bërë të veten që ka bërë dëme të mëdhaja përndryshe ka mujt e tëra me u kallë”, tha komandanti i njësisë së Zjarrfikësve në Lipjan, Sadri Shamolli.
Mirëpo me të dëgjuar rastin, bashkëfshatarët nuk qëndruan duarkryq.
Ata madje filluan menjëherë mbledhjen e donacioneve në xhaminë e fshatit.
“Më së pari iu kemi dhënë ndihmë familjarëve në emergjencë në Lipjan. Jemi kthy, jemi tubu si shoqni si rreth me ndihmën, me sa kanë pasë mundësi kanë kontribu. Për momentin janë mbledhë diku 11 mijë euro, tash janë duke dhënë edhe sot gjatë ditës. Ka edhe firma që kanë premtu materialin për suvatim, ka që kanë folë për rrymë, për qeramika, për dyer e dritare”, tha organizatori, Leogzim Matoshi.
Mbledhja e donacioneve ka vazhduar edhe sot në orën 18:00 në xhaminë në fshatin Topliqan.
