Një qytetar i ka pranuar mbi 3 mijë euro para të gatshme nga këbimorja “Franga” në Prizren ku ankuesi në vend të 402 eurove ia kishte dhënë 4025 Euro, raporton teve1.info
Sipas Policisë, ankuesi kishte këmbyer të holla të valutës “Kron Daneze” me Euro dhe gabimisht i ishin dhënë mbi 3 mijë euro më shumë.
Sipas ankuesit, ka pritur nëse klienti i tij i kthen mjetet por meqë një gjë e tillë nuk ka ndodhur, rastin e ka lajmëruar në Polici.
Policia e ka shpallur në kërkim të dyshuarin për veprën penale “Shpërdorim të pasurisë së huaj”.
“Me datën 24.04.2023 rreth orës 11:30 ankuesi ka raportuar se në biznesin e tij të këmbimores “Franga” me lokacion Rr. Mark Kaçinari – Prizren, derisa ishte duke punuar kishte ardhur një klient për të bërë këmbim të valutave nga “Kron Daneze” në “Euro “, ankuesi ka bërë gabim me mjete monetare gjatë këmbimit dhe në vend të 402.25 eurove ia kthen klientit 4025 euro, ku dallimi figuron të jetë 3622.50 euro.
Ankuesi ka prit një kohë klientin që ndoshta kthehet për t’i kthyer mjetet valutore të dhënë gabimisht mirëpo i njëjti deri me sot nuk është paraqit.
Sektori i hetimeve ka bërë përpjekje maksimale në ndriçim të veprës penale dhe ka siguruar fotografi dhe video të dyshuarit mirëpo deri tani nuk ka rezultuar në identifikim e tij”, thuhet në njoftimin e Policisë.
“Me qëllim të ndriçimit të rastit nga Prokuroria Themelore në Prizren, kemi marr Autorizimin në pajtim të dispozitave të nenit 76 prag 2 te KPPRK-së, për publikimin e fotografive të dyshuarit në mediume televizive dhe media sociale.
Andaj kërkojmë bashkëpunim nga të gjithë qytetarët, që nëse kane çfarëdo informate , apo din diçka për vendndodhjen e të dyshuarit në foto, të raportojnë policinë në Suharekë , apo në cilin do stacion të policisë në Kosovë”, thuhet tutje në komunikatë.
