Të hënën, Italia po përjeton një grevë të përgjithshme si reagim ndaj situatës në Gaza, e cila po ndikon në një sërë sektorësh, përfshirë transportin, arsimin dhe shërbimet publike, raportoi agjencia e lajmeve ANSA.
Punëtorë nga e gjithë Italia iu përgjigjën thirrjeve të sindikatave bazë për të protestuar kundër situatws në Gaza, me demonstrata të organizuara në qytete si Genova, Livorno, Milano, Roma dhe Bolonja.
Grevën, e cila nisi në mesnatë dhe pritet të zgjasë deri në orët e vona të së hënës, po e ndiejnë veçanërisht sektorët e transportit publik lokal dhe hekurudhor, shkollat, portet dhe shërbimet publike.
Sindikata USB kërkoi “ndërprerjen e menjëhershme të marrëdhënieve me shtetin terrorist të Izraelit”, duke e cilësuar këtë si mënyrën më të drejtpërdrejtë për Italinë që të reagojë ndaj, siç e përshkroi, “gjenocidit në zhvillim”.
Protestuesit kanë bllokuar portet në Genova dhe Livorno, sallat e leksioneve në universitetet e Bolonjës, kanë marshuar në Milano në mbështetje të Flotiljes Globale Sumud që synon Gazën, ndërsa në Romë ka pasur anulime trenash dhe në Milano është mbyllur linja e metrosë M4 si pjesë e grevës kombëtare.
“Në Itali, greva e përgjithshme ka mbyllur linjat e trenave, portet, autostradat, shkollat dhe dyqanet. Me një gjenocid që po vazhdon, NUK mund të ketë punë si zakonisht. Qëndroni të qetë të gjithë. Mos reagoni ndaj asnjë provokimi. Liria për të gjithë nuk lejon gabime”, tha raportuesja speciale e OKB-së për territoret e pushtuara palestineze, Francesca Albanese, në rrjetin social X.
