Gazetari, Venhar Isufi, ka treguar se sipas informacioneve që posedon po bëhet thirrje që nesër, në bllokadat e paralajmëruara nga serbët të jenë nga 400 protestues në çdo pikë kufitare.
Isufi, po ashtu ka treguar se gjatë raportimit nga pika kufitare në Jarinje, kanë vërejtur kolona të gjata të veturave të cilat shkonin në drejtim të Serbisë edhe pse qëllimin e saktë të tyre nuk e kanë kuptuar.
“Sipas informacioneve të fundit që kemi nga terreni, po bëhet thirrje që të jenë nga 400 protestues në çdo pikë kufitare. Sa ishim duke raportuar sot nga pika kufitare në Jarinjë, kemi parë kolona të gjata të veturave të cilat shkonin në drejtim të Serbisë, nuk e di saktë a shkonin për t’u bërë pjesë e këtyre protestave. Ajo çfarë shohim ne nga terreni, por edhe duke u bazuar edhe nga protestat e fundit të cilat janë organizuar në komunat veriore, e kemi parë një mospërgjigje të qytetarëve të komunitetit serb për të marrë pjesë”, ka thënë ai në emisionin “Këndi i Debatit”, në tëvë1.
