Drejtori Ekzekutiv i Forumit Ballkanik, Astrit Istrefi, thotë se nuk beson që do të ketë ndryshim pozitiv në raportet ShBA – Kosovë, pas telefonatës së fundit të Sekretarit Amerikan të Shtetit, Anthony Blinken me kryeministrin Albin Kurti.
Istrefi i ftuar në Ditari në Tëvë 1, tha se nuk pret as zgjidhje të shpejtë në veriun e vendit.
“Nuk besoj që ka ndonjë ndryshim në raporte mes ShBA-së dhe Kosovës, pikërisht se kemi deklaratën e ambasadorit të ShBA-së e cila është e mëvonshme. Pas telefonatës nuk besoj që do të ketë ndryshim të raporteve, përmirësim, për arsye se sot jemi duke u përballë jo vetëm me tensione por edhe me kriza të njëpasnjëshme për të cilat nuk do të ketë zgjidhje të shpejtë dhe asnjë përmirësim të situatës në terren në veri të Kosovës”, tha ai.
Sipas Istrefit, rreziku kryesor për Kosovën sot është që më nuk po flitet për vendin në tërësi por vetëm për pjesën veriore.
“Ndërkohë që rreziku sot për sot për Kosovën besoj që janë dy gjëra që janë thelbësore dhe do ta përcaktojnë të ardhmen e vendit. Një është se në narracionin ndërkombëtar nuk flitet më për shtensionim të tensioneve në mes të Republikës së Kosovës dhe Republikës së Serbisë, por pikërisht në theks është vendos veriu i Kosovës, sikur Kosova nuk ekziston. Veriu është problemi, veriu duhet të qetësohet, duhet të shtensionohet situata atje prandaj veriu i Kosovës është kthyer sot në kryetemë siç mund të ketë qenë dikur Irlanda e Veriut, apo konfliktet e ngrira kudo në botë”, u shpreh Istrefi.
“Dalja nga këto kriza nuk është e lehtë dhe nuk është e shpejtë. Edhe nuk besoj që do të ndodhë siç mbase edhe e mendon Qeveria e Kosovës, duke i cilësuar masat që i merr BE si të padrejta, si të paduhura, si të njëanshme, sepse sot po ballafaqohemi me masa dhe nesër mund të kemi edhe masa më të rrepta”, ka shtuar ai.