Ish-kryetari i Komunës së Shtimes, Naim Ismajli ka thënë se të gjitha punësimet që janë duke ndodhur në këtë komunë janë të militantëve të partisë në pushtet, Vetëvendosjes.
Ismajli në emisionin “Info Nata” në Tëvë1 ka thënë se nga ta 80 për qind janë familjare të zyrtarëve të LVV-së.
“Të gjitha punësimet që kanë ndodhur me ardhjen në pushtet të Vetëvendosjes janë militantë të saj. Në të gjitha pozitat e mundshme; arsim, administratë, shëndetësi dhe tjera. Çka është më e keqja në kuadër të kësaj, se 80 për qind nga ta janë familjare të drejtorëve që ka VV dhe të këshilltarëve komunalë dhe me këtë jo vetëm që kanë krijuar pakënaqësi të qytetarët, por edhe të vetë anëtarët e kësaj partie”, ka thënë Ismajli.
Ai më tej, tha se shëndetësia në këtë komunë është duke u keqmenaxhuar dhe ky kryetar është duke dështuar në këtë fushë.
“Nëse i pyet qytetarët e Shtimes pjesa më e madhe e tyre thonë që janë pishman që e kanë votuar këtë parti. Qytetarët tashmë i kanë të vështira edhe takimet me ta. Ne kemi pasur takime të vazhdueshme. Shërbimet për qytetarët janë shumë të dobëta. Gjatë kohës tonë nuk ka pasur mungesë të barnave, kemi pasur mjaftueshëm, tashmë ka mungesa të mëdha. Ky është keqmeaxhim, pasi ai ka premtuar shumë për këtë fushë dhe dështimet më të mëdha i ka këtu”, ka shtuar ai.
