Guvernatori i Bankës Qendrore të Kosovës (BQK), Ahmet Ismaili, zhvilloi sot një takim me përfaqësuesit e Ambasadave të Austrisë, Gjermanisë dhe Zvicrës për të diskutuar zhvillimet në sektorin financiar të Kosovës dhe aktivitetet reformuese në vijim, me theks të veçantë në sistemin e Kartonit të Gjelbër.
Sipas njoftimit, në takim morën pjesë Clarissa Castek, zëvendësshefe e Misionit në Ambasadën e Austrisë në Prishtinë, Christoph Fuchs, Zëvendësshef i Misionit në Ambasadën e Zvicrës në Kosovë; dhe Christian Böttcher, zëvendësshef i Misionit në Ambasadën e Republikës Federale të Gjermanisë në Prishtinë.
“Gjatë takimit, Guvernatori Ismaili i informoi përfaqësuesit e ambasadave për zhvillimet kryesore dhe iniciativat reformuese në sektorin financiar, përfshirë progresin në forcimin e kornizës ligjore dhe rregullative. Vëmendje e veçantë iu kushtua reformave të ndërlidhura me integrimin evropian, përfshirë çështjet që lidhen me sistemin e Kartonit të Gjelbër, në kuadër të mandatit të BQK-së për rregullimin dhe mbikëqyrjen e Byrosë Kosovare të Sigurimit dhe sektorit të sigurimeve”, thuhet në njoftimin e BQK-së.
Guvernatori Ismaili shprehu mirënjohjen e sinqertë të BQK-së ndaj institucioneve të Austrisë, Gjermanisë dhe Zvicrës për mbështetjen e vazhdueshme në forcimin e integritetit, stabilitetit dhe qëndrueshmërisë së sistemit financiar të Kosovës.
“Banka Qendrore e Republikës së Kosovës vlerëson lart bashkëpunimin dhe mbështetjen e partnerëve të saj ndërkombëtarë në avancimin e kornizës ligjore dhe rregullative në përputhje me standardet e Bashkimit Evropian, si dhe në mbështetjen e integrimit të Kosovës në mekanizmat përkatës evropianë”, thuhet në komunikatë.
Ndryshe, Kosova vazhdon të mos jetë anëtare në organizatën ndërkombëtare Kartoni i Gjelbër, pasi që kërkohet që vendi ynë të jetë pjesë e Organizatës së Kombeve të Bashkuara (OKB).
