Kandidati për kryetar të Prishtinës, Uran Ismaili, ka premtuar zhbllokim të trafikun në kryeqytet brenda 18 muajve.
Ai këtë zotim e ka dhënë në hapjen e fushatës zgjedhore.
Në mesin e pesë pikave kryesore të programit të tij, Ismaili përmendi edhe, rrugë të sigurta, 24/7; lagje të pastra, 24/7; prej betonit te komuniteti; Prishtina e së ardhmes.
Në fjalën e tij, Ismaili e përshkroi Prishtinën si “qytet të ëndrrave të mëdha”, por tha se në katër vitet e fundit kryeqyteti është zhytur në kaos nga një kryetar që erdhi nga jashtë, me premtime të mëdha dhe projekte futuristike që nuk u realizuan kurrë. “Na e degradoi Prishtinën dhe na e mbyti shpresën,” tha ai, duke shtuar se qyteti nuk mund të vazhdojë më me justifikime, mashtrime dhe konflikte të pafundme politike.
Ismaili theksoi se është koha që qytetarët të kenë një qeverisje që ofron rezultate të matshme dhe konkrete.
“Prishtina nuk ka kohë për arsyetime e mashtrime. Koha është për punë, koha është për Prishtinën. Sot kemi një mundësi të madhe – ta kthejmë kryeqytetin në qytet të mirëqenies, të sigurisë dhe të mundësive për të gjithë,” tha Ismaili në mbyllje të fjalës së tij.
