Njohësi i çështjeve të sigurisë, Avni Islami, thotë se Lista Serbe, përveç që shantazhuese, ka filluar të bëhet edhe agresive.
Islami thotë se agresivitetin e kanë shpallur duke sulmuar kundërshtarët politikë serbë në Kosovë.
“Jo veç me blerje votash dhe shantazhe ndaj serbëve që jetojnë në Kosovë. Lista Serbe tashmë ka nisur të bëhet edhe më agresive duke përdorur edhe sulme të drejtpërdrejta ndaj tyre. Këtë herë ka ndodhur kundrejt kundërshtarëve të tyre serbë që synojnë futjen në Kuvendin e Kosovës”, ka thënë Islami.
Reagimi i Islamit vjen pasi që një anëtar i Listës Serbe dyshohet se ka sulmuar kandidatët dhe anëtarët e partisë së Aleksandar Jabllanoviqit në Graçanicë.
“Njoftimi vjen nga vet kjo parti, e cila ka treguar në detaje se si ndodhi sulmi dhe kush i sulmoi anëtarët dhe kandidatët e Partisë së Serbëve të Kosovës. Sipas këtij njoftimi, sulmi erdhi nga Marko Arsiq, aktualisht drejtor në Komunën e Graçanicës dhe njëkohësisht pjesë e listës së deputetëve nga Lista Serbe”, ka shkruar ai në Facebook.
Ndërkohë, lidhur me rastin ka reaguar edhe Partia e Serbëve në Kosovë, duke bërë të ditur se rasti është denoncuar në polici.
“Ne morëm garanci se kriminelët do të trajtoheshin sipas ligjit. Banditi i Listës Serbe iku si zakonisht, por jemi të sigurt se ligji dhe drejtësia së shpejti do të veprojnë”, njofton partia e Jabllanoviqit.
Kjo parti iu drejtua Listës Serbe edhe me një kërkesë publike.
“Kërkojmë nga zyrtarët e Listës Serbe që ‘qentë e tërbuar’ t’i mbajnë në zinxhir më të shkurtër sepse ‘lehin’ shumë!”./teve1.info/
