Ka shkrepur me mijëra foto për t’i dokumentuar vuajtjet që po përjetonin shqiptarët e Kosovës nga regjimi i Slobodan Millosheviqit.
Ndonëse ishte shumë i ri në moshë fotoreporteri italian, Marco Di Lauro, kapi pamje të jashtëzakonshme gjatë kohës sa mbuloi luftën në Kosovë.
Megjithatë, dokumentimi i mizorive la kujtime të rënda tek italiani.
Di Lauro thotë se ishte një eksperiencë goxha traumatike t’i shihje njerëzit duke vdekur si pasojë e luftës.
“Të them të drejtën ishte e emocionalisht e rëndë t’i shohësh njerëzit duke vdekur, nuk kisha parë më herët spastrim etnik. Në vitin 1997 serbët filluan t’i sulmonin profesorët nëpër shkolla, mjekët në spitale dhe më vonë vrasjet masive filluan. Për një kohë shumë të shkurtër gjithçka u shndërrua në tragjedi. Në atë periudhë kohore isha shumë i ri dhe ishte një eksperiencë goxha traumatike për mua”, tregoi ai për Tëvë1.
Pas përfundimit të luftës fotografi italian do të kthehej sërish në Kosovë.
Ai tregon se nuk mund t’i besonte syve me transformimin që kishte ndodhur pas vetëm 8 vitesh.
“Kur u ktheva sërish në Kosovë në vitin 2007 u befasova me transformimin që kishte ndodhur. Kosova ishte shndërruar në një vend modern me restorante dhe lokale të bukura. Njerëzit dukeshin bukur dhe ishin të veshur mirë. Kishte ndryshuar shumëçka nga periudha e viteve të 90-ta”, tregoi fotoreporteri.
Përveç luftës në Kosovë, Di Lauro gjatë karrierës së tij ka mbuluar disa nga zonat më të vështira të konfliktit në mbarë globin përfshirë këtu Indinë, Nigerin, Perunë, Afganistanin, Gazën, Palestinën etj.
Puna e fotografit është shfaqur në mediet me të më mëdha ndërkombëtare siç janë New York Times, Washington Post, The Times dhe Daily Telegraph.
