Ish-trajneri i Ballkanit, Artim Shaqiri, është bërë me pozitë të re, në Federatën e Futbollit të Maqedonisë Veriore.
Drejtori teknik i përfaqësueseve të të rinjve në FFM, Gjorgji Hristov, në një konferencë për mediat të premten ka informuar se kryesia e re e federatës po vazhdon me rikthimin e figurave të futbollit në “Shtëpinë e Futbollit”.
Ish-futbollisti i Maqedonisë, dhe së fundit trajner i kampionit të Kosovës, Ballkanit, Artim Shaqiri është emëruar si koordinatorë i ekipeve të të rinjve, i cili do të mbuloj kombëtaret nga mosha 14 deri në 19 vjeç.
Shaqiri si futbollist ka pasur karrierë të gjatë dhe me shumë klube, ndërsa si trajner ka udhëhequr Shkëndijën në Maqedoni, Kukësin e Flamurtarin në Shqipëri dhe ka qenë për një kohë edhe trajner në ligën e dytë të Zvicrës te Schaffhausen.
