Ish-komandanti i Forcës së Sigurisë së Kosovës, Rrahman Rama, ka reaguar pas zhurmës politike që u krijua rreth dislokimit të FSK-së në veri të Kosovës për kërkimin e trupit të pajetë në Liqenin e Ujmanit.
“Një prej misioneve të FSK-së është edhe mbështetja civile dhe kërkim-shpëtimi. FSK-ja e ka kry obligimin e vet. Asgjë e re nuk ka ndodhur. Tentimi për ta politizu këtë operacion humanitar është gabim – pavarësisht prej cilës parti vijnë”, u shpreh Rama në emisionin “Info Nata” në Tëvë1.
Ai theksoi se kjo nuk ishte hera e parë që FSK-ja ka ndërhyrë në pjesën veriore në koordinim me KFOR-in:
“Më 2014 kemi pasur të njëjtin operacion – aksident në Ujman mes dy varkave, ku janë zhdukur persona nga komuniteti serb. Kemi vepruar në bashkëpunim me KFOR-in. Po ashtu në 2016 në lumin Ibër dhe në 2019 për deminim humanitar.”
Sipas Ramës, përdorimi i termit “zbarkim” është jo vetëm i pasaktë, por edhe i rrezikshëm.
“Thonë ‘zbarkim’, por realisht nuk kanë informacion. Ka qenë një dislokim i koordinuar me KFOR-in, i cili është pjesë e NATO-s. Pa koordinim me ta, si mendojmë të bëhemi pjesë e NATO-s?”
Rama u ndal edhe tek reagimi i Ambasadës Gjermane, duke e konsideruar serioz paralajmërimin e saj për rrezikun e manipulimeve politike:
“Reagimi i ambasadës gjermane ka pasur fuqi të jashtëzakonshme – tregoi që edhe ata e kanë kuptuar që situata është kaluar përtej kornizave normale. Nuk ka pasur nevojë me përfitu prej një misioni humanitar kaq të ndjeshëm.”
Në fund, ai përmendi edhe marrëveshjen e vitit 2013 që ndalon dislokimin e FSK-së në veri pa lejen e KFOR-it:
“Atëherë nuk ka pasur garancion, vetëm marrëveshje. Tash është kërkuar edhe letër nga ministri i Mbrojtjes, për t’iu garantuar KFOR-it se operacioni është thjesht humanitar. Dhe kjo është bërë.”
“FSK-ja është e popullit të Kosovës, jo e ndonjë partie. Ka bërë vetëm detyrën e saj.” – përfundoi Rama.
