Ish-këshilltari i Wesley Clark, Michael Durkee, ka përfunduar dëshminë e tij para Dhomave të Specializuara të Gjykatës në Hagë. Ai u paraqit për herë të parë të mërkurën dhe u rikthye të enjten për të folur rreth periudhës pasluftës në Kosovë.
Durkee, i cili ishte këshilltar politik i Clarkut, deklaroi se gjatë takimit të zhvilluar në mars ose prill të vitit 1999 në Mons të Belgjikës me ish-presidentin Hashim Thaçi, ata nuk kishin informacion të qartë mbi kapacitetet e Ushtrisë Çlirimtare të Kosovës.
Ai shtoi se UÇK-ja nuk kishte një strukturë solide të komandës, ku dikush në Prishtinë të mund të jepte urdhra që më pas do të çonin në veprime specifike në terren. “Shumë shqiptarë që u kthyen në shtëpitë e tyre pas luftës ndiheshin të tradhtuar nga persona që kishin rritur bashkë me ta,” theksoi Durkee.
I pyetur nga prokurorja nëse kishte lexuar aktakuzën ndaj ish-krerëve të UÇK-së – Hashim Thaçi, Kadri Veselit, Rexhep Selimit dhe Jakup Krasniqit – Durkee përgjigj shkurt: “Jo, nuk e kam lexuar” dhe shtoi se nuk e dinte për çfarë krimesh akuzohen ata.
Ndryshe, Dhomat e Specializuara të Hagës kanë njoftuar se Wesley Clark, ish-komandanti suprem i Forcave Aleate të NATO-s në Evropë, do të fillojë dëshminë e tij më 17 nëntor në procesin gjyqësor ndaj ish-krerëve të UÇK-së.
