Ish-deputeti i Listës Guxo, Burim Meta i ka dërguar një letër të hapur kryeministrit në detyrë, Albin Kurti përmes së cilës e ka vlerësuar përpjekjen e tij për pajtim me LDK-në për një koalicion të mundshëm.
Megjithatë, Meta duke e vlerësuar si të pamundshëm një koalicion të tillë ka ironizuar duke i propozuar Kurtit që për këtë qëllim t’i përdorë si ndërmjetës Pecin dhe Gërvallën si dy njerëz që sipas tij janë shembull i kombinimit politik në mes të strategjisë, instiktit dhe talentit të pashoq, në artin e improvizimit e mashtrimit.
Postimi i plotë:
Letër e hapur Kryeministrit Albin Kurti
I nderuari Kryeministër!
E shohim që me një përkushtim të pashoq po përpiqeni të ofroni dorën e pajtimit ndaj LDK-së për një koalicion të mundshëm në të mirën e shtetit. Një përpjekje e tillë e denjë është për t’u vlerësuar padyshim. Por, në pamundësi të realizimit të një qëllimi të tillë të parespektueshëm më herët dhe jo mirë të planifikuar, të urtët thonë: kur diplomacia dështon, fut në funksion mediatorin e mediokritetit!
Kryeministër, në këtë frymë, meqë LDK-ja nuk do të të bindet, mund të konsideroni të dërgoni si ndërmjetës mediatorë z. Pecin e znj. Gërvala – Schwarz, si dy figuara të promovuara për artin e tyre të komunikimit, bindjes e afërsisë, që të dy gjithmonë të gatshëm për t’i shpjeguar të vërtetat ashtu siç u pëlqejnë. Këta të dy mund të të organizojnë edhe një simpozium të nivelit të lartë shkencor e politik, ku mospajtimet i shndërrojnë në unitet dhe debatet eventuale i kthejnë në përshtatje ideologjike. Pra, Peci i vogël por me vota shumë, me një buzëqeshje të matur duke shpjeguar se si marrëveshjet janë gjithmonë të hapura për interpretim, ndërsa Gërvalla – Schwarz garanton se komunikimi është çelësi, veçse ndonjëherë çelësi mund ta ndryshoj edhe bravën! A duhet diçka më qartë se kaq? Dhe nëse edhe kjo diplomaci inovative nuk sjellë frytet e dëshiruara, që të dy janë në gjendje të të organizojnë edhe referundimin popullor, meqë zotërojnë edhe vota shumë! Ose krejt në fund, Kryeministër i ke të fortë, siç i ke pasur deri më tani t’i plasosh edhe në një seri tjetër deklaratash epike mediatike, edhe pse me shumë gabime. Këta të dy i ke shembull të kombinimit politik në mes të strategjisë, instiktit dhe talentit të pashoq, në artin e improvizimit e mashtrimit ku shkëlqejnë më shumë se të tjerët. Por, krejt krejt së fundmi i nderuari Kryeministër, shfrytëzoj këta të dy që mos po del ndonjë e mirë eventuale nga ta, meqë që të dy i ke lider të mosmirënjohjes, jodinjitetit, neokomunizmit e demokraturës, sepse këta të dy me qëllimin e vetëm për t’u afruar me Ju, bën çmos, shajtën e ofenduan, shpifën e tradhtuan edhe shtëpinë nga dolën dhe edhe të Asaj që i krijoi e i formësoi politikisht. Nesër mund t’a bëj.
Kurti letër Abdixhikut: Jam i interesuar për marrëveshje politike me LDK-në
