Ish-ambasadori i Kosovës në Bullgari, Edon Cana, ka thënë se Kosova asnjëherë s’ka qenë më e izoluar sa i përket diplomacisë.
Ai ka dhënë kritika për punën e ministrisë së Jashtme të Kosovës, Donika Gërvalla, që sipas tij, ajo në disa vende është si dekor i kryeministrit të Kosovës.
“E shohim ministren e Punëve të Jashtme në vende të ndryshme si dekor i kryeministrit, apo pa ndonjë rol të rëndësishëm. Kosova asnjëherë nuk ka qenë më e izoluar sa i përket aspektit të diplomacisë. Nëse raportet e Kosovës me ShBA-në dhe Shqipërinë nuk janë të mira, atëherë ajo diplomaci është duke punuar kundër interesave të Kosovës”, ka thënë Cana në emisionin “InoNata” në Tëvë1.
Ish-ambasadori ka thënë se shërbimi diplomatik i Kosovës është shkatërruar dhe sipas tij ambasadat e Kosovës kanë mungesë të stafit.
“Është shkatërruar shërbimi diplomatik ambasadat tona janë të zbrazëta nuk kapacitet njerëzor nëpër ambasada dhe vet faktin që në SHBA kemi pasur deri vonë vetëm ambasadorin përjashto atasheun ushtarak është ilustrimi më i mirë se si funksionon diplomacia e Kosovës”, ka thënë ai.
Diplomacia kosovare është kritikuar edhe nga opozita, duke thënë se nuk ka vizion. Në fillim të këtij viti Serbia ka thënë se ka arritur të bind disa shtete që kanë njohur pavarësinë e Kosovës ta tërheqin atë.
Por kjo u demantua nga ambasadorët e Kosovës të cilët zhvilluan takime me disa ambasador të këtyre shteteve që konfirmuan vazhdimin e bashkëpunimit me Kosovën.
Megjithatë shteti i Togos ka konfirmuar tërheqjen e njohjes së Kosovës./teve1.info/
