Ish-ambasadori i Shqipërisë në OKB, Agim Nesho ka komentuar propozimin e kryeministrit shqiptar, Edi Rama për organizmin e një konference të përbashkët ndërkombëtare mes kyeministrit të Kosovës, Albin Kurti dhe presidentit serb, Aleksandar Vuçiq për zgjidhjen e çështjes së Kosovës.
Nesho ka thënë se këto çështje i takojnë institucioneve të Kosovës dhe se sipas tij, Rama e ka personalizuar politikën duke dashur të bëhet personazh kryesor.
Madje, propozimin e Ramës e cilësoi si ndihmë për nacionalzimin serb.
“Të gjitha këto i takojnë institucionit të Kosovës, prandaj mendoj që kjo është brenda asaj aktivizmit të tepruar, ose personalizimit që i bën politikës zotëri Rama, për të qenë një personazh kryesor. Dihen lidhjet e tij tani tepër të rrezikshme me Vuçiqin që nuk mendoj që kapitulli në to ka përfunduar dhe këtë e tregon edhe propozimi, që është një ndihmë për nacionalizmin serb kur kërkon që çështja e Kosovës e propozimeve të BE-së, planit të nomalizmit franko-gjerman të kalojë nëpër një konference ku të mbyllen dy liderët”, tha ai në emisionin “Ditari” në Tëvë1.
Nesho tutje tha se ky propozim është i rrezikshëm sepse siç tha ai, po ta pranojë Kosova këtë konferencë do të duhej të pranonte edhe rezultatet e një kompromisi mes palëve.
“Kjo është pikërisht e rrezikshme sepse në një konferencë të tillë është tepër pragmatike rezultati që del, sepse po të pranosh konferencën duhet ta pranosh edhe rezultatet e një kompromisi midis palëve. Pse duhet të japë Kosova atë që e ka fituar, pse duhet që medoemos Serbia të bëhet një faktor brenda një konflikti artificialisht të krijuar bashkë me politikat e saj të përbashkëta ruse për të mbajtur një zonë konflikti në zemër të Evropës. Unë mendoj që në këtë drejtim Rama indirekt ose dhe direkt nuk e paragjykoj, i ka shërbyer interesave të planeve serbo ruse për të vendosur çështjen e Kosovës në një zgjidhje të re gjeopolitike”, shtoi ai
Idenë për mbajtjen e një konference ndërkombëtare për Kosovën dhe Serbinë e shpalosi më 27 qershor kryeministri i Shqipërisë, Edi Rama. Atë ditë, Rama bisedoi në Bruksel më zyrtarë të lartë evropianë, përfshirë presidentin e Këshillit Evropian, Charles Michel, i cili mbështeti këtë ide.
Teksa, kryeministri i Kosovës, Albin Kurti, nuk e cilëson idenë e një konference ndërkombëtare për Kosovën dhe Serbinë si një zgjidhje potenciale për tensionet mes Kosovës dhe Serbisë, por thotë se zgjidhja është zbatimi i marrëveshjes së arritur në Bruksel.
“Ne kemi pasur konferenca ndërkombëtare në të kaluarën dhe tash kemi një marrëveshje bazike, nga 27 shkurti i këtij viti në Bruksel dhe gjithashtu nga 18 marsi në Ohër me aneksin e zbatimit”, tha Kurti,
Në anën tjetër presidenti i Këshillit Evropian, Charles Michel, ka mbështetur idenë për një konferencë ndërkombëtare për Kosovën dhe Serbinë, me qëllim uljen e tensioneve mes tyre.
“Dua të them se ne e mbështesim edhe idenë për të organizuar, sa më parë që të jetë e mundur, një konferencë – së bashku me disa shtete anëtare të BE-së”, tha Michel, duke theksuar edhe nevojën e koordinimit me SHBA-në../teve1.info./
