Bosch theksoi se kjo gjykatë duhet të jetë një shembull dhe të mos mbahen në paraburgim njerëzit për një kohë kaq të gjatë pa asnjë aktakuzë.
“Gjykata Speciale, edhe pse nuk mund ta thosha atëherë, meqë përfaqësoja qeverinë holandeze, kam qenë gjithnjë kundër saj. Natyrisht, kjo Gjykatë Speciale është krijuar bazuar në trafikimin e organeve, gjë që në këtë rast do të ishte e tmerrshme, sikur ky të ishte rasti, porse raporti i Ëilliamsonit thotë se ky nuk ishte rasti. Prandaj është e çuditshme se si u vazhdua me këtë gjykatë, meqë evropianët po paguajnë para të majme për këtë. Dhe, ndoshta krimet edhe kanë ndodhur, porse krimet ndodhin gjithandej nëpër botë ku ka konflikte, megjithatë për to nuk ka Gjykata Speciale për secilin vend. Më e keqja çka kemi parë ka qenë ISIS. A ka ndonjë Gjykatë Speciale për ISIS? Krimet që janë kryer aty kanë qenë krimet më të tmerrshme që unë mund t’i imagjinoj. Prandaj, unë nuk e di pse kjo gjykatë-kjo gjykatë shumë e shtrenjtë, është akoma e nevojshme kur arsyeja kryesore e trafikimit të organeve nuk ekziston”, tha ai.
Bosch ka thënë se Kosova dhe Shqipëria po bashkëpunojnë për të bërë diçka që do ta ndalonte Specialen, dhe këtë e quajti gjë të mirë.
Tha se kur pas dy vjetësh nuk ka aktakuzë për një person, duhet ndalur edhe paraburgimi.
“Nuk e di a është e koordinuar, porse së paku po ndodh: Shqipëria dhe Kosova po bashkëpunojnë në mënyrë aktive për të bërë diçka për këtë gjykatë. Shpresoj se ka një koordinim për këtë çështje, nuk e di. Por meqë e dimë se raportet ndërmjet dy liderëve të dy vendeve nuk janë njëqind për qind të mira… e kjo është një mëkat. Mendoj se maksimum janë dy vjet sa dikush mund të mbahet në paraburgim dhe kur nuk ka aktakuza akoma, atëherë duhet ndalur. Posaçërisht kur kemi të bëjmë me një organ ndërkombëtar si ky, atëherë ky duhet të jetë shembull se sa ndershëm bëhen këto gjykata. Kjo gjykatë duhet të jetë një shembull i tillë dhe të mos mbahen në paraburgim njerëzit për një kohë kaq të gjatë dhe akoma s’kemi asnjë aktakuzë”./ KosovaPress
