Ministri i Jashtëm irlandez është shprehur i alarmuar të hënën për katastrofën humanitare dhe “veprimet gjenocidale” tw Izraelit në Rripin e Gazës , duke përsëritur kërkesën e Irlandës për të pezulluar një Marrëveshje Asociimi BE-Izrael.
Tanaisti irlandez, Simon Harris kërkoi “përpjekje urgjente” për të siguruar një armëpushim, për të rritur ndihmën humanitare dhe për të liruar pengjet në Gaza, por shtoi se Izraeli në vend të kësaj “po lëviz në drejtimin e kundërt”.
“Nëse Izraeli vazhdon me pushtimin e planifikuar të Qytetit të Gazës, kjo do të thotë më shumë gjakderdhje, më shumë humbje jetësh, më shumë uri dhe një distancë edhe më të madhe nga çdo shpresë për paqe. Plani i fundit nuk duhet të zbatohet”, vuri në dukje ai.
Të premten, Kabineti i Sigurisë i Izraelit miratoi planin e kryeministrit izraelit Benjamin Netanyahu për të pushtuar qytetin e Gazës, duke shkaktuar reagime të ashpra ndërkombëtare nga qeveritë dhe organet e të drejtave të njeriut.
Komentet e Harris pasuan një videokonferencë joformale të ministrave të punëve të jashtme të BE-së, ku diskutuan zhvillimet përpara takimit të planifikuar të Presidentit të SHBA-së, Donald Trump, të premten me Presidentin rus Vladimir Putin në shtetin amerikan të Alaskës.
Sulmet izraelite dhe situata e rënduar humanitare në Gaza ishin në axhendën e ministrave të jashtëm gjatë takimit joformal të së hënës.
Harris tha se Komisioni Evropian duhet të paraqesë veprime konkrete që Evropa mund të ndërmarrë për të rritur presionin mbi Izraelin që të ndryshojë kursin.
“Është shumë e qartë se Izraeli po shkel Nenin 2 të Marrëveshjes së Asociimit dhe është thelbësore që, në takimin tonë të ardhshëm të Punëve të Jashtme, të ndërmerren veprime konkrete dhe të vihet në tryezë një meny opsionesh”, tha ai.
“Irlanda është e vendosur të qëndrojë e mendimit se Marrëveshja e Asociimit duhet të pezullohet deri në ndërprerjen e çdo dhune”, tha ai. “Ne duhet të ndërmarrim veprime konkrete, jo vetëm të lëshojmë deklarata dënimi.
Izraeli po përballet me dënime në rritje për luftën e tij gjenocidale në Gaza, ku ka vrarë gati 61,500 viktima që nga tetori i vitit 2023. Fushata ushtarake ka shkatërruar enklavën, e cila po përballet me vdekje të lidhura me urinë.
