Udhëheqësi suprem i Iranit, Ayatollah Ali Khamenei, ka kundërshtuar bisedimet me SHBA-në, në lidhje me programin e saj bërthamor, sepse ato do synonin vendosjen e kufizimeve në rrezen e raketave iraniane dhe ndikimin e saj në rajon.
Duke folur me një grup zyrtarësh të shtunën, Khamenei nuk identifikoi Shtetet e Bashkuara me emër, por tha se një “qeveri ngacmuese” ishte këmbëngulëse në shtytjen e saj për bisedime.
“Bisedimet e tyre nuk kanë për qëllim zgjidhjen e problemeve, por për… le të flasim për t’i imponuar atë që duam palës tjetër që është ulur në anën e kundërt të tavolinës.”
Khamenei tha se kërkesat e SHBA-së do të jenë ushtarake dhe të lidhura me ndikimin rajonal të Iranit.
“Ato do të kenë të bëjnë me aftësitë mbrojtëse, me aftësitë ndërkombëtare të vendit. (Ata do ta nxisin Iranin) të mos bëjë (disa) gjëra, të mos takojë disa njerëz të caktuar, të mos shkojë në një vend të caktuar, të mos prodhojë disa artikuj, distanca juaj e raketave nuk duhet të jetë më shumë se një distancë e caktuar. A është e mundur që dikush t’i pranojë këto?”
Vërejtjet e Khameneit erdhën një ditë pasi presidenti, Donald Trump pranoi se i dërgoi një letër Khameneit duke kërkuar një marrëveshje të re me Teheranin për të frenuar programin e tij bërthamor që po avanconte me shpejtësi dhe për të zëvendësuar marrëveshjen bërthamore nga e cila e tërhoqi Amerikën gjatë mandatit të tij të parë në detyrë.
Trump në komentet për gazetarët në Zyrën Ovale të premten nuk e përmendi letrën drejtpërdrejt. Por ai bëri një referencë të fshehtë për një veprim të mundshëm ushtarak, duke thënë: “Ne kemi një situatë me Iranin që diçka do të ndodhë shumë shpejt. Shumë, shumë shpejt.”
