Irani ka dorëzuar një ankesë zyrtare kundër Rafael Grossi, drejtorit të Agjencisë Ndërkombëtare për Energjinë Atomike (IAEA), duke e akuzuar atë për anshmëri dhe mosveprim ndaj sulmeve izraelite mbi objektet bërthamore iraniane. Lajmi u raportua të dielën nga media lokale iraniane.
Në një letër drejtuar Këshillit të Sigurimit të OKB-së, ambasadori i Iranit në Kombet e Bashkuara, Amir-Saeid Iravani, kritikoi ashpër qëndrimin publik të Grossi-t gjatë valës së sulmeve ndaj Iranit, duke e quajtur atë “një shkelje serioze të parimit të paanshmërisë” që kërkohet nga pozita që ai mban.
Sipas Iravanit, Grossi ka dështuar të marrë masa parandaluese dhe penguese për të frenuar këto sulme, duke u treguar i heshtur dhe pasiv përballë shkeljeve të vazhdueshme ndaj sovranitetit të Iranit dhe të drejtës ndërkombëtare, shkruan Anadoly.
Ankesa iraniane u paraqit disa orë pas deklaratës së presidentit amerikan Donald Trump, i cili konfirmoi se forcat amerikane kishin goditur tre nga objektet kryesore bërthamore të Iranit – Fordow, Natanz dhe Isfahan – si pjesë e një sulmi të koordinuar me Izraelin.
