Pasi që presidenti amerikan, Donald Trump kërcënoi se do “bombardonte” Iranin në rast se nuk pranon marrëveshje për armët nukleare, lideri suprem i Iranit, Ayatollah Ali Khamenei i është kundërpërgjigjur se “çdo agresion i jashtëm” do të përballet me “hakmarrje të fortë”.
Duke folur në një tubim gjatë namazit të Fitër Bajramit në Teheran, të hënën ai tha se vendi është i përgatitur për çdo eventualitet.
“Ne nuk besojmë se ka gjasa të ketë ndonjë agresion të jashtëm, por nëse ndodh ndonjë akt agresioni, ata padyshim do të marrin një goditje të fortë hakmarrëse,” tha ai.
Irani ka refuzuar negociatat e drejtpërdrejta me administratën Trump, por ka mbajtur kanalet diplomatike të hapura për të adresuar çështjet e diskutueshme bërthamore përmes negociatave indirekte.
Qeveria e Iranit iu përgjigj letrës së Trump përmes Omanit javën e kaluar, duke vënë në dukje mosgatishmërinë e saj për t’u përfshirë në negociata të drejtpërdrejta nën kërcënimet ushtarake, siç deklaroi Ministri i Jashtëm, Abbas Araghchi të enjten, sipas raportimit të agjencisë Anadoly.
Në letër Trump thuhet se i kërkonte Iranit të negocionte një marrëveshje të re bërthamore për të zëvendësuar marrëveshjen e vitit 2015, e cila u vu në sfond pasi SHBA u tërhoq nga ajo në maj 2018 gjatë presidencës së parë të Trump.
Pas përgjigjes së Iranit, Trump në një intervistë tha se “Nëse ata nuk bëjnë një marrëveshje, do të ketë bombardime”.
“Do të jetë bombardim i ngjashëm me të cilin ata nuk kanë parë kurrë më parë” tha ai.
Khamenei tha gjithashtu se muaji i shenjtë i Ramazanit të këtij viti ishte “i hidhur” për muslimanët në mbarë botën për shkak të ngjarjeve në Gaza dhe Liban, duke e mbajtur SHBA-në bashkëpunëtore në mizoritë izraelite kundër palestinezëve.
Ai e përshkroi Izraelin si një “forcë përfaqësuese” të fuqive perëndimore në rajonin e Azisë Perëndimore, duke pohuar se “grupi kriminal” duhet “çrrënjosur nga Palestina”.
