Inspektorati Policor i Kosovës ka njoftuar se ka rekomanduar suspendimin e përkohshëm të pesë zyrtarëve policorë, përfshirë një rreshter dhe katër zyrtarë të tjerë, në lidhje me incidentin e ndodhur pas mesnatës në rrugën “Haradin Bajrami” në Lipjan, ku një qytetar humbi jetën.
Sipas IPK-së, hetuesit janë duke zhvilluar hetime intensive në koordinim me Prokurorinë e Shtetit, të cilat përfshijnë:
Identifikimin dhe intervistimin e dëshmitarëve okularë,
Mbledhjen e provave materiale,
Sigurimin dhe analizimin e incizimeve nga kamerat e sigurisë dhe telefonat mobil.
“Të gjitha këto video materiale do të jenë pjesë e ekzaminimeve të detajuara që pritet të ndihmojnë në sqarimin e rrethanave të këtij incidenti dhe mënyrës së reagimit policor,” thuhet në komunikatën zyrtare.
IPK thekson se suspendimi është një masë administrative e përkohshme që nuk paragjykon përgjegjësinë ligjore apo profesionale të zyrtarëve të përfshirë.
Hetimi, sipas IPK-së, do të jetë i pavarur, objektiv dhe gjithëpërfshirës, me qëllim të vlerësimit nëse gjatë ndërhyrjes policore janë respektuar procedurat ligjore dhe standardet profesionale të Policisë së Kosovës.
“Rastet e kësaj natyre trajtohen me prioritet të lartë dhe çdo përgjegjësi eventuale individuale apo institucionale do të adresohet sipas ligjit dhe autorizimeve të IPK-së,” thuhet më tej në komunikatë.
Postimi i plotë:
