Inspektorati Policor i Kosovës (IPK) ka rekomanduar suspendimin e një zyrtari policor të angazhuar në pikëkalimin kufitar në Vërmicë, nën dyshimin për “keqpërdorim të pozitës apo autoritetit zyrtar”.
Sipas njoftimit zyrtar të IPK-së, hetimet janë iniciuar pasi dyshohet se zyrtari policor ka përdorur në mënyrë të paautorizuar bazën e të dhënave të policisë kufitare, duke verifikuar të dhënat personale të një qytetari – shtetas i Republikës së Kosovës – pa ndonjë arsye zyrtare.
“Pas konsultimeve me Prokurorinë Themelore në Prizren, është vendosur që rasti të trajtohet në procedurë të rregullt. Hetuesit e IPK-së dyshojnë se zyrtari në fjalë ka verifikuar në sistem nëse qytetari ishte apo jo në kërkim policor, ani pse ky i fundit nuk ka qenë fare prezent në pikëkalimin kufitar,” thuhet në komunikatë.
Hetimet në këtë rast do të vazhdojnë, ndërsa IPK ka paralajmëruar se do të ndërmerren edhe veprime të tjera hetimore për të zbardhur të gjitha rrethanat që lidhen me rastin.
