Inspektorati Policor i Kosovës ka rekomanduar suspendimin e një zyrtari policor në Ferizaj, pas një incidenti që dyshohet të ketë ndodhur gjatë arrestimit të një personi, ku është përdorur forcë e tepruar.
Dyshohet se gjatë arrestimit të personave të përfshirë, njëri nga zyrtarët policorë ka tejkaluar autorizimet ligjore duke ushtruar forcë ndaj drejtuesit të automjetit, i cili si pasojë ka pësuar lëndime trupore dhe ka pranuar trajtim mjekësor.
“Ngjarja ka ndodhur mbrëmë para mesnatës kur disa zyrtarë policorë edhe pse e kishin sinjalizuar ndaljen e një veture e njëjta nuk ishte ndaluar. Sipas informacioneve të para raportohet se pas disa minutave të përcjelljes nga policia e njëjta veturë është ndaluar dhe se në këtë veturë ndodheshin tre qytetarë. Hetuesit e IPK-së kanë dale në vendin e ngjarjes dhe kanë filluar të ndërmarrin veprime hetimore lidhur me këtë rast pasi që dyshohet se gjatë arrestimit të personave të dyshuar ka tejkalime të autorizimeve policore gjatë përdorimit të forcës nga një zyrtar policor ndaj njërit të dyshuar (drejtuesit të automjetit) i cili ka pësuar lëndime trupore dhe ka pranuar tretman mjekësor”, thuhet në njoftimin e IPK-së.
Hetuesit e IPK-së kanë dalë në vendin e ngjarjes dhe kanë nisur veprimet hetimore, ndërsa rasti po hetohet për veprat penale “Keqtrajtimi gjatë ushtrimit të detyrës zyrtare apo autorizimeve publike” dhe “Lëndimi i lehtë trupor”./teve1.info/
