Inspektorati Policor i Kosovës dhe Shërbimi Spitalor Klinik Universitar i Kosovës nënshkruajnë Marrëveshje Bashkëpunimi për Ofrimin e Shërbimeve Shëndetësore dhe Psikologjike për Punonjësit e IPK-së
Kryeshefi Ekzekutiv i Inspektoratit Policor të Kosovës, Kushtim Hodaj, dhe Drejtori i Përgjithshëm i Shërbimit Spitalor Klinik Universitar të Kosovës, Elvir Azizi, kanë nënshkruar sot një marrëveshje bashkëpunimi për ofrimin e shërbimeve mjekësore dhe psikologjike për punonjësit dhe rekrutët e IPK-së.
Marrëveshja synon rregullimin e bashkëpunimit mes SHSKUK-së dhe IPK-së, duke siguruar mbështetje të specializuar shëndetësore për të gjithë punonjësit dhe rekrutët e IPK-së. Përmes këtij marrëveshje, punonjësve të IPK-së do t’u ofrohen shërbime mjekësore, psikologjike dhe specialistike të nivelit dytësor dhe tretësor pa pagesë, me prioritet, në SHSKUK dhe të gjitha spitalet rajonale të këtij shërbimi.
Kjo iniciativë është një hap i rëndësishëm për mbrojtjen e shëndetit dhe mirëqenies së punonjësve të IPK-së, duke u mundësuar atyre akses në shërbime shëndetësore të cilësisë së lartë.
Inspektorati Policor i Kosovës ka shprehur falënderimet e tij për Shërbimin Spitalor Klinik Universitar të Kosovës dhe stafin e tij për bashkëpunimin dhe përkushtimin në mbrojtjen e shëndetit të punonjësve të IPK-së.
