Për vrasjen e trefishtë në Gjilan, u suspenduan katër zyrtarë policor.
Këtë rekomandim e dha Inspektorati Policor i Kosovës të hënën.
Të gjithë policët ishin pjesë e Drejtorisë Rajonale të Policisë në këtë komunë.
Sipas IPK-së, po hetohet nëse ka pasur ndonjë lëshim apo përfshirjeje të mundshme të zyrtarëve në veprimtarinë kriminale të të dyshuarit i shpallur në kërkim për vrasjen e trefishtë në Gjilan.
“Bazuar në rekomandimin e IPK-së janë suspenduar një rreshter policor dhe një hetues nga njësiti i hetimeve rajonale të Drejtorisë rajonale në Gjilan, një rreshter policor – shef i hetimeve në Stacionin Policor të Novobërdës dhe një zyrtar policor i angazhuar në Njësinë e Reagimit të Shpejtë, Drejtoria Rajonale e Policisë Gjilan”, kanë thënë nga IPK-ja.
Dyshimi për përfshirje të zyrtarëve policorë në këtë rast është alarm për policinë për ish drejtorin e këtij institucioni, Reshat Maliqin.
Maliqi thotë se nëse vërtetohet përfshirja e tyre, ata duhet të largohen menjëherë nga puna.
“Me çdo person që mbjen në kundërshtim me ligjin nuk është etike e as nuk është morale po e thom policia me bashkëpunu, me u shoqëru me ta edhe me qëndru me ta në lokale të ndryshme me persona të atillë. Mjerisht ata persona bëjnë përpjekje dhe iu imponohen zbatuesve të ligjit, iu imponohen njerëzve të politikës”, ka thënë Maliqi.
Hetimin e IPK-së për zyrtarët policor i përshëndet njohësi i sigurisë, Nuredin Ibishi.
Ai thotë se persona të tillë nuk e kanë vendin në organet e drejtësisë.
“Nëse tregohet një lidhje e tillë është jashtëzakonisht e rëndë, ngase zyrtarët policor janë të pavarur në kryerjen e detyrës dhe absolutisht nuk duhet të kenë implikime në rastet kriminale të bashkëpunimit apo mbështetjes së këtyre kriminelëve sepse kanë një pasojë kaq të rëndë”, është shprehur Ibishi.
Të dielën në rrugën “Ibrahim Rugova” në Gjilan, u vranë tre persona dhe dy të tjerë u plagosën.
Të dyshuarit për këtë ngjarje janë Mefail Shkodra, me dy djemtë e tij Edonisin dhe Engjullin.
Të tre këta nga e diela janë në arrati.
