Një rast i shkrepjes aksidentale tw armës zyrtare ndodhi nga një polic para disa javësh në Mitrovicë.
Në këtë situatë nuk pati lëndime pos dëmeve materiale, megjithatë Inspektorati Policor i Kosovës nisi hetimet.
Në një përgjigje për tëvë1, nga ky institucion tregojnë numrin e rasteve që kanë hetuar për këtë vepër penale.
“IPK përkatësisht Departamenti i Hetimeve gjatë vitit 2023 ka iniciuar 2 raste, ndaj 2 punonjësve policor ndërsa gjatë vitit 2024 ka iniciuar 3 raste ndaj 3 punonjësve policorë. Aktualisht në masën suspendimit janë 2 punonjës policor, kurse për rastet e mëhershme ka pasur edhe dy suspendime dhe në një rast zyrtari policor është arrestuar. Prej gjithsej pesë rasteve gjatë dy viteve të fundit, katër prej tyre janë dorëzuar në prokuroritë kompetente me kallëzime penale”, thuhet nga IPK-ja.
Autoriteti mbikëqyrës i Policisë thotë se këto raste nuk janë të shpeshta marrë parasysh numrin e përgjithshëm të policëve.
“Por gjithsesi se është shqetësuar si për IPK ashtu edhe për vet Policinë e Kosovës. IPK pas hetimit të këtyre rasteve vlerëson se janë faktorë të ndryshëm që ndikojnë që zyrtarët policorë të kenë shkrepje nga pakujdesia por më i shpeshti vlerësohet të jetë mos respektimi i rregullave të sigurisë mbi përdorimin e armës”.
Marrë parasysh se shumica e rasteve ndodhin nga gjeneratat e reja, ish-shefi i hetimeve në Polici ka një propozim.
“Kjo po duket se këta janë të interesuar në kuantitet edhe në shpejtësi të daljes, kryerjes së atij kursi 3-mujor por pa u fokusuar shumë në brendësi dhe ndryshimin e planprogrameve. Tash kjo po del unë një herë e kam pasë theksu që ndoshta është mirë në periodën të paktën në periudhën 3 deri në 6 mujore të mos bartin fare armë gjatë trajnimit fushor”, tha koloneli në pension, Rrahman Sylejmani.
Kurse nënkoloneli në pension, Refki Morina vlerëson të ketë trajnime të brendshme edhe pas përfundimit të akademisë nga policët.
“Dmth duhet të jenë trajnime immediate, jo vetëm trajnime të specializuara pasi kryerjes që kryhen edhe në Kosovë edhe jashtë vendit por kemi edhe trajnime të brendshme të cilët në një mënyrë e bëjnë që Policia e Kosovës të aftësohet t’i përdorë pajisjet të cilat shqoëria ia ka dhënë që t’i përdorë në rast nevoje conform ligjit mbi Policinë”, tha ai.
Vitin e kaluar një zyrtar policor kishte plagosur aksidentalisht tezakun e tij, duke i shkaktuar plagë vdekjeprurëse.
