Inspektorati Policor i Kosovës ka njoftuar se janë intervistuar katër zyrtarë policorë të dyshuar për përfshirje në veprat penale “Ndihmë gjatë kryerjes së veprës penale” dhe “Zbulim i fshehtësisë zyrtare”.
Sipas IPK-së intervistimi i të dyshuarve është bërë të mërkurën nga Prokuroria Themelore në Gjakovë, pas realizimit të dy kontrolleve në mëngjes në dy lokacione të ndryshme në këtë regjion.
“Kontrollet janë kryer në kuadër të një hetimi penal që është duke u zhvilluar ndaj disa zyrtarëve policorë, lidhur me dyshimet për përfshirje në veprat penale “Ndihmë gjatë kryerjes së veprës penale” dhe “Zbulim i fshehtësisë zyrtare”, thuhet në njoftim.
Po ashtu bëhet e ditur se gjatë realizimit të kontrolleve, hetuesit e IPK-së kanë sekuestruar disa prova materiale që siç thuhet ‘mund të kenë rëndësi për procedurën hetimore’.
“Nga hetuesit e IPK-së në bashkëpunim të ngushtë me Prokurorinë Themelore Gjakovë pritet të ndërmerren edhe veprime të tjera procedurale në përputhje me mandatin ligjor dhe autorizimet përkatëse”, theksohet në fund./teve1.info/
