Deputeti i Lidhjes Demokratike të Kosovës, Arben Gashi ka thënë se Gjykata Kushtetuese në aktgjykimin e saj për seancën konstituive ka theksuar se propozuesi i kryetarit të Kuvendit ka përgjegjësi edhe për konstituimin.
Ai ka thënë se në demokraci parlamentare nuk janë të rëndësishme vetëm numrat por edhe pjekuria politike.
“E drejta ekskluzive për të propozuar Kryetarin/en e Kuvendit nuk është e shkëputur nga përgjegjësia politike për të ndërtuar kompromis dhe për të siguruar mbështetjen e nevojshme parlamentare. Kjo do të thotë se përgjegjësia institucionale nuk mund të ushtrohet në mënyrë të njëanshme – ajo kërkon bashkëpunim, respektim të procedurave demokratike dhe ndërtim të konsensusit politik. Demokracia parlamentare nuk është thjesht çështje numrash, por çështje pjekurie politike dhe përgjegjësie kushtetuese. Nuk ka ekskluzivitet pa përgjegjësi. Nuk ka demokraci pa vullnet për marrëveshje. Kush dështon të ndërtojë konsensus, dështon të udhëheqë”, ka shkruar ai.
