Pasi u mposht në derbin lokal nga Milani, kampioni në fuqi i Italisë, Interi, synon të kthehet te fitorja në Serie A.
Interi të shtunën nga ora 15:00 luan në udhëtim ndaj Udineses. Ndeshja i takon xhiros së gjashtë të kampionatit italian.
Interi nuk ka nisur më së miri mbrojtjen e titullit. Në pesë ndeshje mblodhi vetëm tetë pikë. Udinese ka shfaqur më shumë deri më tani. I ka dhjetë pikë. Kështu që ndeshja e së shtunës nuk do të jetë aspak e lehtë për Interin.
Edhe Udinese pësoi në xhiron e kaluar. Madje me rezultatin e thellë, 3:0, nga Roma.
Të shtunën janë edhe dy ndeshje të tjera. Nga ora 18:00 takohen Genoa e Juventusi. Me shumë interes pritet edhe takimi Bologna – Atalanta, që fillon në ora 20:45. Bëhet fjalë për dy skuadrat që luajnë në Ligën e Kampionëve.
Torino – Lazio është ndeshja e parë e së dielës, që zhvillohet nga ora 12:30. Prej orës 20:45, Napoli e pret Monzan.
