Instituti i Mjekësisë Ligjore ka reaguar pas raportimeve të disa mediave se ka dalë raporti preliminar i autopsisë për rastin e 27-vjeçarit Agon Zejnullahu, i cili ndërroi jetë gjatë arrestimit nga Policia e Kosovës në Lipjan.
Në njoftimin zyrtar, IML ka sqaruar se autopsia është kryer me urdhër të Prokurorisë së Shtetit, nga një ekip profesional i udhëhequr nga eksperti mjeko-ligjor kujdestar dhe me pjesëmarrjen e zyrtarëve të caktuar nga Policia e Kosovës.
“Deklarojmë me përgjegjësi morale dhe profesionale se nga IML nuk ka dalë asnjë raport preliminar dhe lajmet e publikuara në disa portale janë të pavërteta,” thuhet në reagimin zyrtar të Institutit.
Sipas IML-së, aktualisht janë në proces analizat histopatologjike dhe toksikologjike të mostrave të marra gjatë autopsisë, të cilat janë të domosdoshme për përfundimin e plotë të raportit.
Instituti thekson se mbetet i përkushtuar ndaj mandatit të tij ligjor për të ofruar ekspertizë të pavarur dhe profesionale për organet e drejtësisë dhe qytetarët e Kosovës.
Rasti i Agon Zejnullahut ka shkaktuar reagime të shumta publike dhe institucionale, ndërsa pesë zyrtarë policorë janë arrestuar nën dyshimet për “vrasje nga pakujdesia”. Prokuroria e Prishtinës ka njoftuar se do të kërkojë masën e paraburgimit për ta.
Postimi i plotë:
