Menjëherë pas fillimit të agresionit rus në Ukrainë, Qeveria e Kosovës nisi përshpejtimin e anëtarësimit të vendit në NATO.
Ekzekutivi formoi një grup ndërministror, ku për qëllim kishte angazhimin për anëtarësimin e Kosovës në Aleancën Veriatlantike, në krye me Ministrinë e Punëve të Jashtme.
Tëvë1 ka kërkuar të dijë rreth punës së këtij grupi, tri vjet pas formimit, por që as Ministria e Punëve të Jashtme as ajo e Mbrojtjes gjatë javës nuk kanë kthyer përgjigje.
E koloneli në pension i Forcës së Sigurisë së Kosovës, thotë se mos-transparenca e institucioneve ka një shpjegim.
“Nganjëherë kur bisedohet për këso gjërash, për nisma apo iniciativa të ndryshme nga e Qeverisë që në shikim të parë duken tejet të rëndësishme për vendin dhe do duhej të ishin ashtu, më vonë del se ato iniciativa më shumë po i shërbejnë agjendave ditore për t’u prezantuar gjoja me një punë të rëndësishme në interes për vendin e që do duhej të ishte në interes”, tha koloneli në pension, Hysen Gecaj.
Sipas tij, iniciativa të tilla nuk kanë qenë të nevojshme.
“Për shkak se ne tashmë kemi një shtet, kemi instucionet tona, burimet financiare që dihet kah rrjedhin dhe si rrjedhin… Prandaj krahas asaj jotransparence dhe nisme fillestare me pompozitet dhe heshtja për tri vite duket qartë se këto nisma po na shërbejnë sa për një moment të caktuar politik dhe pastaj nuk jemi të interesuar të flasim për to”, tha ai.
Transparencë më të madhe të punës po kërkon edhe njohësi i çështjeve të sigurisë, Bedri Elezi.
“Çdo jo transparencë në çështjet që kanë të bëjnë me angazhimet e Kosovës në institucione ndërkombëtare, nënkupton edhe përpjekjet për të fshehur eventualisht dështimet apo regresin në rast se institucionet e Republikës së Kosovës kanë në çështjen në fjalë. Mund të themi se grupe të tilla do duhej të kishin minimalisht takime të rregullta me media në Kosovë për të treguar planet fillimisht të këtij grupi punues”, tha Elezi.
Shefja e shtetit, Vjosa Osmani gjatë takimit me sekretarin e përgjithshëm të NATO-s, Mark Rutte tha që anëtarësimi i Kosovës në aleancën ushtarake është domosdoshmëri strategjike për paqen.
