Në bankë janë mbi një milionë e gjysmë për mbulimin e kërkesave të kontratave të sigurimit.
Sipas likuidatorit të kësaj kompanie, 81% e këtyre kërkesave janë paguar, e për pjesën tjetër si shkaktar vonese i ka lënë palët e dëmtuara.
“Nuk ka pasur asnjë zvarritje nga Likuidatori, por pengesa me e madhe vjen si rezultat i mungesës së korrektësisë nga avokatët ndaj palëve të dëmtuara, ku në shumë raste rezulton që palët e treta nuk janë njoftuar për vlerësimet e komisionit likuidues, ose duke i mbajtur palët e treta me pretendimin se kur kërkesat të shkojnë në Byronë Kosovare të sigurimeve do të kenë vlerësime më të larta”, thotë Liridon Berisha, likuidator në INSIG
Sipas Bankës Qendrore të Kosovës, deri në fund të vitit të kaluar, kjo kompani ka paguar mbi 6 milionë euro dëme.
E nga shtatori i vitit të kaluar, janë hapur procedurat e likuidimit edhe të një kompanie tjetër të sigurimeve, Kosova e Re.
Vlera e dëmeve materiale e jo materiale të kësaj kompanie, kap shifrën e 6.33 milionë eurove.
“Gjatë kësaj periudhe konform ligjit dhe rregullores për likuidimin e siguruesve janë ushtruar 6058 kërkesa. Kurse 767 kërkesa për kthim primi për pjesën e pashfrytëzuar (pro rata temporise) janë për polica të sigurimit duke përfshirë edhe ato para periudhës së likuidimit si dhe kërkesat që kanë qenë në procese gjyqësore”, Nezir Lokaj – likuidator i Kosova e Re.
E për policat e këtyre dy kompanive, të cilat kanë qenë aktive edhe pas revokimit të licencës, barra e kompensimit bie mbi Byronë Kosovare të Sigurimit.
Vetëm në katër muajt e parë të vitit 2022, ky institucion ka paguar mbi 250 dëme.
Drejtori ekzekutiv, Sami Mazreku, ka bërë thirrje që palët e dëmtuara të shkojnë t’i nxjerrin mjetet për të cilat komisioni likuidues ka llogaritur koeficientit, pasi që sipas tij, me kalimin e kohës vlera mund të zvogëlohet.
Sipas legjislacionit në fuqi, procesi i likuidimit përfundon në momentin kur të përmbushen të gjitha kërkesat ligjore.
Kronika e realizuar nga gazetarja Florijeta Dernjani
