Presidentja e Kosovës, Vjosa Osmani është pritur nga presidenti i FIFA-s, Gianni Infantino në selinë e tij në Paris, ku diskutuan për përmirësimin e infrastrukturës sportive dhe mbështetjen e futbollit kosovar.
Takimin me presidenten Osmani, kreu i FIFA-s e ka cilësuar si një privilegj të madh, duke shtuar se institucioni që ai drejton e mbështet Federatën e Futbollit të Kosovës (FFK).
Infantino ka shkruar në rrjetin e tij në “Instagram” edhe për takimin e mëparshëm që e kishte pasur me presidenten Osmani në vitin 2022 kur e kishte vizituar për herë të parë Kosovën.
“Ne folëm sesi futbolli mund t’i bashkojë njerëzit dhe kemi parë planet për të vazhduar përmirësimin e infrastrukturës sportive në Kosovë, e cila do të mbështesë lojtarët e rinj të talentuar të vendit në realizimin e potencialit të tyre”, ka shkruar ndër të tjera Infantino.
Kreu i FIFA-s, gjithashtu zbuloi se i ka thënë presidentes Osmani se qeveria e saj dhe FFK-ja mund të llogarisin gjithmonë në mbështetjen e FIFA-s për zhvillimin e futbollit.
