Një ngjarje tragjike ndodhi të hënën në Liverpool, ku një minivan u përplas me një turmë tifozësh gjatë festimeve për titullin kampion të ekipit të futbollit të qytetit.
Si pasojë e incidentit, 47 persona u plagosën, përfshirë katër fëmijë, ndërsa katër të rritur, mes tyre një fëmijë, ndodhen në gjendje shumë të rëndë në spital.
Policia e Merseyside njoftoi se një burrë 53-vjeçar është arrestuar lidhur me përplasjen, por nuk po e trajton incidentin si akt terrorizmi, ka raportuar AP.
Sipas autoriteteve, nuk ka të dyshuar të tjerë dhe identiteti i shoferit nuk është bërë publik, në përputhje me politikat e zakonshme në Britani, ku emrat e të dyshuarve nuk bëhen të ditur pa u ngritur zyrtarisht akuza.
Ngjarja ndodhi në rrugën Water, pranë lumit Mersey, në zemër të qytetit të Liverpoolit, ku mijëra tifozë ishin mbledhur për të festuar me lojtarët që parakalonin me një autobus me çati të hapur, duke shënuar triumfin e tyre të 20-të në Premier League – një arritje historike që barazon rekordin e ligës.
Rruga ku ndodhi aksidenti është aktualisht e rrethuar me shirita policorë dhe një tendë blu është ngritur për hetime të mëtejshme. Mbeturina të festës, përfshirë shishe, kanaçe dhe flamuj të Liverpoolit, janë ende të shpërndara në vendin e ngjarjes.
Hetimet për shkaqet e përplasjes janë ende në zhvillim.
